Петропавл қаласының Береке ықшам ауданында «Келешек мектептері» ұлттық жобасы аясында жаңа №29 орта мектеп өз есігін айқара ашты. Салтанатты рәсімге Солтүстік Қазақстан облысының әкімі Ғауез Нұрмұхамбетов қатысып, ұстаздар мен ата-аналарды, оқушыларды қуанышқа бөлеген бұл оқиғаның өңірдің білім беру жүйесі үшін маңызын атап өтті.
Жаңа мектеп бір ауысымда 600 оқушыға лайықталғанымен, жаңа оқу жылын 780 бала бастап отыр. Оның ішінде 85 бірінші сынып оқушысы және мектепалды даярлық сыныбының 47 тәрбиеленушісі бар.
Мектеп заманауи талаптарға сай толық жабдықталған. Мұнда кең сыныптар, спорт және акт залдары, STEM-зертханалар, робототехника және хореография кабинеттері, коворкинг аймақтары бар. Балалардың қауіпсіздігі үшін бейнебақылау, дыбыстық хабарлау жүйесі және турникеттер орнатылған. Оқушыларға ыңғайлы болуы үшін жеке шкафтар қойылған.
Сонымен қатар, мектепте түрлі үйірмелер жұмыс істеп, балалардың шығармашылық қабілеттерін дамытуға жағдай жасалған. Инклюзивті білім беруді қолдау мақсатында сенсорлық бөлме мен арнайы кабинеттер ашылды.
«Келешек мектептері» жобасы – елімізде білім беру инфрақұрылымын жаңғыртуды көздейтін бастама. №29 мектеп Солтүстік Қазақстан облысында осы жоба аясында салынған екінші білім ошағы болды.
Жаңа оқу жылының заманауи әрі қолайлы жағдайда басталуы Береке шағын ауданы тұрғындары үшін үлкен қуаныш сыйлады.
